SIKU MBILI KABLA YA UCHAGUZI VIPEPERUSHI VYA KUTISHIA USALAMA VYA SAMBAA.

Siku 2 kabla ya siku ya uchaguzi mkuu kufanyika, watu wasiojulikana wamesambaza vipeperushi kwenye mitaa ya manispaaya Mtwara Mikindani, vikitishia asipochaguliwa mgombea ubunge wa chama cha wananchi– CUF toka umoja wa katiba ya wananchi– UKAWA kwa jimbo la Mtwara mjini, nyumba zao zitachomwa moto.

Wakitoa taarifa juu ya vipeperushi hivyo kwenye kikao kati ya jeshi la polisi, viongozi wa vyama vya siasa na waandishi wa habari, baadhi ya washiriki wa kikao hicho wamesema, walianza kuviaona vipeperushi hivyo mitaani kuanzia majira ya alfajiri, vikiwa na maneno hayo ya kutishia usalama, wakati taifa likielekea kufanya ucahguzi mkuu, na hivyo kuliomba jeshi la polisi kufuatilia vipeperushi hivyo, kwani havina nia njema kwa wananchi wa mkoa huo.

Alipoulizwa juu ya madai hayo, mgombea ubunge wa chama cha wananchi–CUF kwa kivuli cha umoja wa katiba ya wananch – UKAWA jimbo la Mtwara mjini Maftaha Nachuma ambae ametajwa kwenye vipeperushi hivyo, amekanusha kushiriki kuvifahamu, akidai kitendo hicho kimefanywa na wapinzani wake, kwa lengo la kumchafua yeye, chama chake na umoja wa katiba ya wananchi - UKAWA.

Kwa upande wake, kamanda wa polisi mkoani Mtwara kamishna msaidizi wa polisi Henry Mwaibambe amesema, polisi inayo taarifa juu ya vipeperushi hivyo, ambapo amedai, vingine vimekutwa vimetupwa kwenye eneo la makazi ya jeshi hilo, na hivyo polisi imeanza uchunguzi juu ya wahusika wa tukio hilo, huku akiwataka wananchi wa mkoa huo kutokuwa na hofu, kwani polisi ipo makini kudhibiti hali ya amani mkoani humo. 

 Credity: ITV